عايزين زعيم
{مواصفات رئيس مصر}
*****
زجل الدكتور صبرى إسماعيل
* ****
عايزين زعيم –فى ضِلّه ننعم بالأمان
ماتجيش ف يوم الحارة تشعر بامتهان
وسينا يزرعها اسماعين
وولاد بلدنا شغّالين
ولا يوم يسود البلطجى والألعوبان
******
عايزين زعيم—الكلّ عنده سواسية
يبقى العلام----- وبجد عِلم وتربية
وخلاص يتوه شغل الدجل
وإعلانات نصب الهبل
ويقود حياتنا واقتصادنا الأزكيا
******
عايزين زعيم—يجمعنا صحبة كلّنا
يبكى بعينيه لو يوم صرخ بالآاه تاريخنا وزرعِنا
ياخد بإيدنا للعمار
ونجيب معاه الإزدهار
ونلاقى مصر مزهزهه مع شعبنا
******
عايزين زعيم-نطقه وقراره حِكمِته
مش كل يوم يرمينا فى سجون حضرته
وتحيى دولة القانون
بدون طوارئ أو جنون
ولا يِغضِب البساتين جمالُه !وزمرته
******
عايزين زعيم مانكونش بيه صورة ل كابول
لا القتل يبقى مفخرة-والهدم يجرى زى غول
ويكون مثلنا المصطفى
فى السنة والقرأن شِفا
ويعلّى راية شرعِنا خير العقول
*****
عايزين زعيم –أهل البلد مايعانو فقر ولا مرض
يحمينا من غدر الحياة أو غدر اخويا لو شرد
والنوبة تحضن بور سعيد
والفرح يرجع من جديد
ونكون فى وقت الشدة إيد واحدة ودِرِعِك يابلد
******
عايزين زعيم---- فى العدل يشبه للفاروق
دااحنا الحضارة وعِلمِنا عدّا الشروق
واحنا الأدب واحنا زويل
واحنا على ناسا دليل
طب ليه نغيّر جِلدِنا –يامصرى فووق
الرئيسية 
أحدث الصور 
التسجيل 
دخول 
