مين ملهمك؟

مين ملهمك؟
*****
أشعار الدكتورصبرى إسماعيل
******
سألونى مين مُلهِمَك؟
ردّيت و قلت امّى
رَِبتنى من عطفِها وحَفظتها ف دمّى
إنْ قلت آاه تِرتعد ماهى أصلها أمّى
****
قالو ومين بَعدها؟
قلت الأب وحَنانه
وسنين محضّن قوى وواهِبنا وجِدانه
وف خيره عيشنا سوا زهور فى بُستانه
****
قالو ومين؟ رَدّيت
صبيّة من حُسنها ساكنة عروق دمّى
خَدنى حنان قلبِِها دايماً تِشيل همّى
حورية فى سِحرها وف عطفها أمّى
****
قالو ومين بعدهم؟
قلت الوطن والنيل
وبحر ناثر فى بلدى الفُلّ والأكاليل
وولد صغيّر قوى بيعشق المواوويل
*****
قالو ومين بعدهم؟
قلت قُدسى الحزينة
وسور بيفصل ولادها عن أغلى مدينة
وغصن زَيْتون رويته بدِمانا فى سينا
****
قالو ومين بعدهم؟
قلت البِحُور والدم
تِسيل وتجرىبالأسى والهمّ
قالو لى ليه يا ترى؟
أنا قلت قاتل ومقتول ولاد عم
****
قالو ومين بعدهم؟
قلت الغبى الإرهاب
وشظايا تِرمى الجُثث ما حدّدو أسباب
والجانى منى أنا لكن طَالع له نابْ
****
قالو ومين بعدهم؟
قلت اللى باعو ضمير
ودمّروا فى الوطن برضه بدون تفسير
****
قالو ومين بعدهم؟
قلت بنى صهيون
وجيش كبير الأعادى
وهجمته المجنون
وظُلم بيّن لِنا لكن فى يوم هيكون
إعصار يزيل حُصنهم بإذن رب الكون
****
سألوا وليه ماخافوا ربّنا؟
قلت الكريم هوّ
يمنحنى كل الأمل و العزم والقوة
قادر يهدّ القوى,,, هوّ العظيم هوّ